§ 1
Navn felagsins er Ráðgevarafelagið og heimstaður felagsins er Tórshavn.
§ 2
Endamál felagsins er at savna allar ráðgevandi fyritøkur við heimstaði í Føroyum, serliga í byggivinnuni at útinna felags áhugamál.
Í virki sínum skal felagið skipa fyri felags menning í vinnugreinini, bæði í virkjunum, og av teimum karmum virkað verður undir. Millum limirnar skal felagið stuðla undir samskifti og førleikamenning, og úteftir virka sum felags málgagn mótvegis myndugleikum, stovnum og aðrari vinnu.
§ 3
Umsóknir um limaskap skulu sendast nevndini, sum tekur støðu til umsóknina. Avgerð nevndarinnar kann kærast fyri aðalfundin, sum tekur endaliga avgerð. Sum limur kunnu takast upp fyritøkur, hvørs høvuðsvirksemi og endamál er at veita ráðgeving innan prosjektering, verkfrøði og arkitektur. Limaskapur krevur harumframt, at fyritøkan hevur teknað eina professionella ráðgevaratrygging.
§ 4
Limirnir hava skyldu at halda lógir felagsins. Tær avgerðir, ið aðalfundurin ella nevndin taka, eru bindandi fyri limirnar.
Um limur ikki vil ganga undir eina tílíka avgerð, kann nevndin koyra viðkomandi úr felagnum uttan ávaring, og kann hesin ikki gerast limur aftur tey næstu tvey árini. Áðrenn viðkomandi verður limur aftur, skal møgulig skuld til felagið verða goldin.
Tvey árs eftirstøða inniber, at limur av sær sjálvum missir limaskapin. Áðrenn limaskapurin kann fáast aftur, skal øll skuld til felagið verða goldin.
§ 5
Árliga limagjaldið verður ásett á ársaðalfundinum. Fult limagjald verður eisini goldið fyri innlimingarárið. Inngoldið limagjald verður nýtt til rakstur felagsins í tann mun, sum nevndin, heldur at tørvur er á.
Skuldi tað í felagnum verið tørvur á meira peningi fyri at fremja serlig mál, so kann nevndin útvega henda pening við tilskotum frá limunum. Eisini kann aðalfundurin, til útvegan av slíkum peningi, álíkna limunum eykagjald.
Nevndin hevur heimild til at tekna lutapening ella partapening í øðrum feløgum eftir góðkenning frá aðalfundinum.
Felagið verður bundið við undirskrift formansins ella honum, ið er í hansara stað. Til dagligu umsitingina av sjálvum felagnum kann nevndin geva skrivara fulltrú.
§ 6
Nevndin tekur sær av áhugamálum felagsins, hevur fyrisætið við sjálvum felagnum og ansar eftir, at felagsins lógir og samtyktir verða hildnar. Allar avgerðir á nevndarfundum verða samtyktar við vanligum meiriluta.
§ 7
Aðalfundurin hevur hægsta ræðið í felagnum.
Limirnir hava eina atkvøðu fyri upp til 3 ársverk, millum 4 og 10 ársverk tvær atkvøður, millum 11 og 20 ársverk tríggjar atkvøður, millum 21 og 50 ársverk fýra atkvøður og fyritøkur við fleiri enn 51 ársverkum fimm atkvøður.
Eitt árs eftirstøða í limagjaldi inniber miss av atkvøðurætti.
Limur kann geva øðrum limi skrivliga fulltrú at umboða seg á aðalfundinum.
§ 8
Ársaðalfundurin verður hildin eina ferð um árið - ikki seinni enn 1. mai.
Lýst verður til vanliga aðalfundin minst 14 dagar frammanundan. Nevndin ásetir tíð og stað fyri aðalfundin, og avger á hvønn hátt hann verður lýstur.
Dagsskráin á vanliga aðalfundinum er henda:
1. Val av fundarstjóra
2. Framløga av limalista
3. Frásøgn nevndarinnar frá farna ári
4. Framløga av grannskoðaðum roknskapi frá farna ári
5. Val av nevndarlimum og eykalimum
6. Val av grannskoðara
7. Áseting av limagjaldi fyri komandi árið
8. Ymiskt
Allar samtyktir á aðalfundinum skulu verða skrivaðar í gerðabókina.
§ 9
Øll mál, felagnum viðvíkjandi, kunnu viðgerast á vanligum aðal- ella eykaaðalfundi. Lógarbroyting kann bert fara fram, tá ið uppskot um lógarbroytingina er sett fram frammanundan, og uppskotið er lýst í kunngerðini um aðalfundin.
Til at broyta felagslógirnar krevst vanligur meiriluti.
Har ikki annað er tilskilað í lógunum, verða allar avgerðir samtyktar við vanligum meiriluta.
Er vanligi aðalfundurin ikki viðtøkuførur, kann samtykt verða gjørd um at kalla saman til eykaaðalfundar. Á eykaaðalfundinum kann slíkt uppskot verða samtykt við minst 2/3 av teimum atkvøðum, ið eru umboðaðar á fundinum, sjálvt um ikki helvtin av limunum er á fundi.
§ 10
Í nevndini sita 3 ella 5 limir. Limirnar sita í 2 ár
[1]. Valt verður millum limir felagsins. Harumfamt verða 2 tiltakslimir valdir hvørt ár.
Nevndin skipar seg sjálv. Á hvørjum nevndarfundi verður gerðabók førd, sum verður undirskrivað av hjástøddu nevndarlimum.
Nevndin kann seta kassameistara og skrivara.
§ 11
Eykaaðalfundurin kann verða hildin, tá ið í minsta lagið 2 nevndarlimir ella limir, ið umboða minst 1/5 av atkvøðunum, krevja tað. Nevndin ásetir tíð og stað fyri eykaaðalfundin, sum verður kunngjørdur við minst 7 daga ávaring
§ 12
Felagsins roknskaparár er álmanakkaárið.
Roknskapur verður grannskoðaður av felagsins grannskoðara.
§ 13
Felagið kann verða avtikið við aðalfundarsamtykt, treytað av at minst 2/3 av samlaðu atkvøðunum í felagnum atkvøða fyri. Uppskot um felagsins avtøku má tó verða lýst fyri limunum eins og uppskot um lógarbroyting.
§ 14
Verður felagið tikið av, verða ognir felagsins at nýta til frama fyri endamál, sum avtøkuaðalfundurin tekur avgerð um.
[1]Nevndarvalið verður skipað soleiðis: 2 limir verða valdir annað hvørt ár og 1/3 limir annað hvørt ár.
