Ársins Virki og Vinnuátakið

Ársins Virki og Vinnuátakið eru afturvendandi á Vinnudegnum, og stórur spenningur er altíð um, hvør vinnur heiðurin hesaferð.

Endamálið við at velja Ársins Virki og Vinnuátakið er at menna vinnuligan hugburð, skapa stoltleika í vinnuni og at økja virðingina fyri vinnuni hjá myndugleikunum og vanliga borgaranum.

Heiðurin sum Ársins Virki verður latin virki ella fyritøku, sum hevur verið støðug ella vaksandi, og dentur verður lagdur á fíggjarlig úrslit seinastu árini. Virkið skal hava víst framfýsni og áræði innan útflutning, framleiðslu, vøru- og tænastumenning, tøknifrøði, útbúgving ella innan annað øki, og hetta skal eftir styttri áramál hava elvt til menning og vøkstur.

Vinnuátakið hevur áður itið Ársins Átak, men í sambandi við næstseinasta Vinnudag ynskti Føroya Arbeiðsgevarafelag at leggja serligan dent á búskaparliga, umhvørvisliga og sosiala burðardygd, og tí er eisini heitið á heiðrinum broytt. Vinnuátakið verður latið virki ella persóni, sum hevur gjørt eitt serligt átak, ið kann gagna vinnuligum framburði. Talan kann vera um einstakt átak, men kann eisini vera arbeiði, sum er gjørt í longri tíð.

Í 2023 fingu Navigare Shipping og Battery Briner heiðurin sum ávikavist Ársins Virki og  Ársins Átak.

Í dómsnevndini at velja Ársins Virki og Vinnuátakið sita:

• Turið Arge, Bank Nordik
• Jean Djurhuus, Betri Banki
• Martin Tvede Zachariassen, Fróðskaparsetur Føroya
• Herálvur Joensen, Umhvørvis- og vinnumálaráðið
• Niels Winther, Vinnuhúsið
• Álvur Højgaard, Navigare Shipping (Ársins Virki 2023)

Vinnarin av Ársins Virki 2023

Vinnarin av Vinnuátakinum 2023