Á árliga Vinnudegnum, sum í ár verður 30. September, verður ársins virki og ársins átak kosið. Endamálið við hesum er at menna vinnuligan hugburð og økja um virðingina fyri vinnuni hjá myndugleikum og borgarum. Endamálið er eisini at geva virkjum, sum á einhvønn hátt hava klárað seg væl, eitt herðaklapp og treysti til at halda fram á somu kós.
At velja Ársins Virki er framhaldandi ein týdningarmikil partur av Vinnudegnum. Til at velja Ársins Virki situr ein dómsnevnd, ið er vald av nevndini í Føroya Arbeiðsgevarafelag. Dómsnevndin er sett saman við tveimum umboðum fyri vinnuna, tveimum umboðum fyri fíggjarstovnar og einum umboði fyri tað almenna. Umframt at leggja dent á fíggjarlig úrslit seinastu árini, hyggur dómsnevndin eisini eftir, um fyritøkur hava víst framfýsni og áræði á ymiskum økjum, og um hetta hevur viðført menning og vøkstur av fyritøkuni. Hetta kann t.d. vera viðvíkjandi framleiðslu, útflutningi, útbúgving ella vøru- og tænastumenning.
Hesar fyritøkur hava higartil fingið heiðurin sum ársins virki:
2000 Havsbrún
2001 Tórshavnar Skipasmiðja
2002 Vónin
2003 Vaðhorn
2004 Reyni Service
2005 Faroe Marine Products
2006 Thor
2007 Eik Banki
2008 ArtiCon
2009 Bakkafrost
2010 Tavan
2011 ?
Ársins Virki hevur verið kosið á hvørjum ári, meðan Ársins Átak hevur verið kosið, tá mett hevur verið, at fyritøka ella persónur hava gjørt eitt serligt átak, ið kann gagna vinnuligum framburði. Hetta kann vera eitt einkult átak, men kann eisini vera arbeiði, sum er gjørt í longri tíð.
Tey, ið hava fingið heiðurin Ársins Átak higartil, hava verið:
2000 Ikki valt
2001 North Atlantic Fish Fair
2002 Teitur Lassen
2003 Formula.fo, Total View
2004 Atlantic Airways, sáttmálin við Aker Stord
2005 Fariga Seafood
2006 Vinnuvitan
2007 Ikki valt
2008 Decision3
2009 Tórshavnar Matfestivalur
2010 Vilt í Suðuroy
2011 ?
Hvør verður Ársins Virki og Ársins Átak 2011 verður avdúkað í Norðurlandahúsinum 30. september. Umframt heiðurin fær Ársins Virki eina serliga standmynd, ið er gjørd til endamálið, sum gávu frá Føroya Arbeiðsgevarafelag. Talan er um eina standmynd stoypta í bronsu. Fyri Ársins Átak verður latin ein minni standmynd, sum er eitt V úr stáli við búmerkinum hjá Føroya Arbeiðsgevarafelag graverað í.
