Eftir tveir spennandi og krevjandi kappingardagar vórðu føroyameistararnir funnir í FM fyri handverkslærlingar
Hósdagin og fríggjadagin í farnu viku varð skipað fyri FM fyri handverkslærlingar, har lærlingar úr ymsum fakøkum kappaðust um heiðurin at gerast føroyameistari í sínum handverki
Kappingin, sum varð hildin í glæsuligu umstøðunum á Glasi, savnaði nógv áhugað fólk, har bæði fakfólk, arbeiðsgevarar og familjur komu saman at fylgja við spennandi avbjóðingunum, sum lærlingarnir skuldu loysa.
Luttakararnir vístu framúr dugnaskap og nærlagni í teirra arbeiði. Kappingin fevndi um seks ymisk fak, har hvør lærlingur skuldi loysa uppgávur, ið kravdu bæði vitan, gott handalag og kreativa hugsan. Kappast varð í hárfríðkan, el, maskinsmið, timbur, bilsmið og rør- og blikksmið.
Tiltakið var ikki bara kapping, men eisini framsýning av, hvussu týdningarmikil handverksfakini eru fyri samfelagið. Tað var eisini gyltur møguleiki hjá vinnuni at síggja nýggjar og evnaríkar lærlingar, sum í framtíðini verða við til at menna handverksvinnuna í Føroyum.
Við spennandi kappingum, góðum fakligum práti og sterkum felagsskapi var FM fyri handverkslærlingar 2025 eitt væleydnað tiltak. Vinnararnir av kappingini fingu heiður, viðurkenning og ikki minst royndir, sum fara at gagna teimum í teirra víðari yrkisleið.
Eftir tveir spennandi og krevjandi kappingardagar vórðu føroyameistararnir funnir, og teir vórðu:
- Hárfríðkan: Beinta Mouritsen, Karin’sa
- El: Karstin av Teiginum Jacobsen, El-Kervið
- Maskinsmið: Jónas Petersen, MEST Skála
- Timbur: Elmar Jacobsen, Holm Bygging
- Bilsmið: Símun Bendix Larsen, Reyni Service
- Rør- og blikksmið: Ólavur Abrahamsen, Renovent
Myndir: Kateryna Vishchak Joensen
