Jobmatch hevur vunnið sær pláss sum fast afturvendandi átak. Fyrireikingin til Jobmatch 2013 byrjaði spakuliga í summar, men tað hevur gingið so skjótt at fáa tilmeldingar, at tað longu er fult teknað. Møguleiki er tó fyri at víðka um tiltakið, við at opna ein part av høllini við síðuna av, sum gevur pláss til einar tíggju básar afturat.
“Vit hava ætlanir at skapa eitt dynamiskt rúm, har átakið “Vit velja Føroyar” kemur at hava eitt pláss. Í stuttum snýr átakið seg um at fortelja positivar søgur um hví útisetar velja at búseta seg í Føroyum. “Vit velja Føroyar” fer at skipa fyri ymiskum áhugaverdum, sum vit vænta kemur at samla vitjandi á Jobmatch í tí ´nýggja´ hølinum”, sigur Marius Thomassen, fyrireikari av Jobmatch.
Marius Thomassen vónar at síggja enn fleiri fyritøkur á Jobmatch, tí hann er vísur í, at Jobmatch førir til týdningarmikil sambond millum arbeiðsgevarar og tey lesandi, sum føra til ítøkilig arbeiði. Eitt nú fingu fleiri enn 30 vitjandi ítøkiligt tilboð frá arbeiðsgevara eftir Jobmatch í fjør.
Jobmatch 2013 verður mánadagin 30. desember í Østrøm. Fá meira at vita á www.jobmatch.fo ella við at skriva til marius@syntesa.fo.
