Føroya Arbeiðsgevarafelag skrivaði 7. oktober undir nýggjar høvuðsavtalur við SFS, Yrkisfelagið Trygdina og Finansforbundet.
Høvuðsavtalurnar eru broyttar orsakað av, at Føroya Arbeiðsgevarafelag hevur yvirtikið hesar frá Arbeiðsgevarafelagnum hjá Fíggjarstovnum í Føroyum, sum gjørdist limur í FAG í 2008. Hetta merkir eisini, at tað verður Føroya Arbeiðsgevarafelag, sum fer at standa fyri komandi sáttmálasamráðingunum fyri hetta øki. Verandi sáttmálar ganga út 1. mai 2011, og væntandi er, at samráðingarnar byrja nakað áðrenn.
SFS eru fakfelag fyri starvsfólk í Eik Banka, Norðoya Sparikassa, Suðuroyar Sparikassa og Elektron. Yrkisfelagið Trygdin er fakfelag fyri starvsfólk í Tryggingarfelagnum Føroyar og Lív.
Finansforbundet er fakfelag fyri starvsfólk í Føroya Banka.