Við nýggju veitaraskránni hjá Vinnuhúsinum, er nú lættari at finna og fáa samband við handverksmeistarar, ið eru limir í Føroya Handverksmeistarafelag.
Í dag er nýggj veitaraskrá leysgivin á heimasíðuni hjá Vinnuhúsinum, industry.fo. Veitaraskráin er ætlað at vísa hvørjir meistarar eru limir í Føroya Handverksmeistarafelag og hvussu tú fært samband við teir við telefon ella telduposti.
Treytir fyri at gerast limur í Føroya Handverksmeistarafelag er at viðkomandi hevur útbúgving og sveinabræv á sínum fakøki. Hetta eigur at vera ein trygd fyri at kundin fær arbeiði gjørt til lítar av fakfólki.
Hevur tú ætlanir um bygging, umvæling, viðlíkahald ella annað, ið ein handverksmeistari lættliga tekur sær av, so finnur tú viðkomandi í veitaraskránni hjá Vinnuhúsinum.