Fleiri enn 50 luttakarar úr norðurlendsku byggivinnuni savnaðir til kjak um møguligt nýtt norðurlendskt samstarv
Í farnu vikuni savnaði Nordic Sustainable Construction umboð úr byggivinnuni í Norðurlondum til ráðstevnu í Keypmannahavn. Endamálið var at deila vitan um gongdir og átøk í Norðurlondum, ES og aðrastaðni, og at geva íkast til eitt nýtt møguligt norðurlendskt byggisamstarv frá 2025-2030.
Luttakararnir, við ymiskum fakligum bakgrundum, hittust í Keypmannahavn fyri at kjakast um týdningarmikil evni innan verandi arbeiðshættir og framtíðarviðsjónir fyri byggivinnuna. Á verkstovuni vóru luttakarar úr øllum liðum av byggivirkseminum umboðaðir, eins og fyri ymisk norðurlendsk lond.
Dagurin byrjaði við framløgu frá Nordic Sustainable Construction um arbeiðið, sum higartil er framt á økinum. Síðani løgdu ES-umboð fram broytingar í ES-umhvørvislóggávuni, sum koma í gildi næstu árini, eitt nú um áseting av CO2-útláti fyri nýbygningar.
Verkstovan legði dent á fýra evni, ásett av norðurlendsku Húsa- og Byggimálaráðharrunum: Klima, Ringrás og Digitalisering. Umframt hetta varð ES umrøtt sum tvørgangandi evni. Høvuðspunktini frá verkstovuni vóru:
Klima:
- Norðurlond sum undangonguøki í innføring av EPBD (Energy Performance of Building Directive)
- Skyldubundin kortlegging av CO2 í verandi bygningum.
- Norðurlendskar tilmælisásetingar fyri CO2-goymslur í bygningum.
Ringrás:
- Norðurlendskar mannagongdir og virðisketur fyri endurnýtslu av tilfar.
- Lóggávuátøk fyri at minka um niðurbróting av bygningum.
Digitalisering:
- Brúk av AI og stórum dátum til betri kunning um tilfar og endurnýtslu.
- Menning av felags digitalum pallum fyri tilfarsskráseting og endurnýtslu.
Ráðstevnan endaði við eini vitjan til KB32, ein fyrrverandi goymslubygningur, sum er umbygdur til nútímans skrivstovuhøli, sum eitt gott dømi um, hvussu verandi byggilutir kunnu nýtast aftur við nýhugsan og tilrættislegging.
Meira um verkstovuna kann lesast her.
