Felagið Føroyskir Peningastovnar mælir í skrivi til fíggarnevndina staðiliga frá, at løgtingið samtykkir broytingaruppskotið í kapitalvinningsskattalógini, sum Tjóðveldi legði fram í desember 2008. Verður uppskotið samtykt, fer tað at skerja ta íløgumentan, sum hevur tikið seg upp í Føroyum seinastu árini, heldur felagið.
Tjóðveldi vil við broytingaruppskotinum nokta fradrátti av rentuútreiðslum í kapitalvinningi, um so er, at íleggjari hevur tikið lán til íløgu.
Uppskotsstillararnir siga, at verandi reglur geva ein serligan skattafyrimun til privatfólk, um tey læna sær pening at keypa partabrøv fyri. Men talan er ikki um nakran serligan skattafyrimun, tí frádrátturin fæst bert, um íløgurnar geva yvirskot, og viðkomandi tískil hevur positiva kapitalinntøku.
Í grundgevingunum fyri uppskotinum verður verandi skipan samanborin við skipanir í 80'unum. Men samanberingin er hvørki rímilig ella røtt, heldur Felagið Føroyskir Peningastovnar, tí frádrátturin fyri rentur er í egnari staðfestari kapitalinntøku hjá íleggjarum, og landskassin skal ikki leggja út pening fyri tey, ið gera íløgur.
At samanbera verandi reglur við skipanir í 80'unum, ið høvdu við sær útgjald úr landskassanum, og har landið ofta bar tap vegna tann einstaka, er beinleiðis villleiðandi, heldur Felagið Føroyskir Peningastovnar.
Felagið vísir á, at uppskotið gongur ímóti altjóða leiðreglunum um roknskaparførslu, vanligum meginreglum um symmetri í skattalógini og samsvarar heldur ikki við tær reglur, ið grannalond okkara nýta. Í skrivi til fíggjarnevndina mælir felagið tí tinglimum til at atkvøða ímóti uppskotinum.
Yvirhøvur heldur Felagið Føroyskir Peningastovnar, at kapitalvinningsskattalógin, ið varð sett í gildi í desember 2001, hevur havt sera gagnliga ávirkan á føroyska búskapin. Kapitalvinningsskattalóggávan var fortreytin fyri, at Virðisbrævamarknaður Føroya kundi fara til verka, ein tilgongd, ið hevur økt munandi um áhugan hjá føroyingum at gera íløgur í virðisbrøv.
Føroyskir íleggjarar hava gjørt sær bæði góðar og ringar royndir, men samanlagt hevur tilgongdin havt positiva ávirkan á búskaparvøksturin í Føroyum og verið við til at spjatt váðan í vinnulívinum. Umráðandi er tí, at heimskreppan ikki fær politikarar at fara í panikk og avmarka tann dynamikk, ið ein virkin virðisbrævamentan hevur við sær.
Felagið Føroyskir Peningastovnar
Annað á breddanum
Nýggj kanning av marknaðaratgongd fyri føroyskar vørur og tænastur
Føroyskar fiskaútflutningsfyritøkur eftirlýsa betri marknaðaratgongd tollmessiga og veterinert á fleiri áhugaverdum marknaðum. Føroyskir útflytarar av tænastum eftirlýsa fleiri tvískattasáttmálar
01. Juli. 2024Hvør skal hava heiðurin sum Vinnuátakið 2024?
Á árliga Vinnudegnum velur ein dómsnevnd á hvørjum ári Ársins Virki og Ársins Vinnuátak. Hetta er eisini ætlanin at gera í ár.
25. Juni. 2024 | Almenn tíðindiGreining: Útlendsku starvsfólkini stóran búskaparligan týdning
Nýggj búskaparlig greining vísir, at útlendsk starvsfólk hava stóran týdning fyri føroyska búskapin. Lutfalsliga stórur partur av útlendingunum koma til Føroya í arbeiðsørindum, og tað er eisini við til at økja um positivu ávirkanina á búskapin
24. Juni. 2024 | Almenn tíðindi