Í valskránni eru fleiri viðurskifti í fiskivinnuni, sum flokkurin ætlar at broyta. Føroya Arbeiðsgevarafelag tekur undir við sjónarmiðið hjá flokkinum um at fremja eina fiskivinnunýskipan, sum ger vinnuna frælsari og tryggari í varandi kørmum. Men Føroya Arbeiðsgevarafelag heldur, at hetta fyrst av øllum skal gerast við at lækka veiðitrýstið, soleiðis at fiskastovnarnir undir Føroyum koma fyri seg aftur, og veiðan hervið gerst so stór, sum hon átti at verði. Ein tílík broyting skal gerast við støði í teimum tilmælum, sum Havstovan kemur við.

Føroya Arbeiðsgevarafelag fegnast um týdningin, sum Fólkaflokkurin leggur á vøkstur, at tað skal loysa seg at arbeiða, skatta- og avgjaldssteðg á vinnulív umframt átøk á vinnuøkinum, sum t.d. at tryggja fría kapping, útbjóðing av almennum tænastuveitingum og at einskilja almennar vinnufyritøkur. Fólkaflokkurin vil eisini virka fyri eini flat-skatta skipan við hækkandi botnfrádrátti, og ein slík skipan hevði loyst trupulleikan við høga føroyska marginalskattinum. Tó fyriliggja ongar útrokningar, sum meira nágreiniliga vísa hvussu hetta skal skiljast. Føroya Arbeiðsgevarafelag heldur, at tørvur er á eini skattanýskipan, og felagið bjóðar seg fram til at luttaka í einum tílíkum arbeiði.

Føroya Arbeiðsgevarafelag fegnast um, at Fólkaflokkurin vil áseta ein útreiðslusteðg fyri almennu útreiðslurnar, og at yvirskot skal vera á fíggjarlógini í 2016. Tað undrar tó Føroya Arbeiðsgevarafelag, at samstundis sum flokkurin setur sær hesi mál umframt lægri skatt, so vil flokkurin samstundis fremja eina røð av tiltøkum til heilsu, trivnað o.a., ið hava útreiðslur við sær fyri almenna geiran. Tað vildi tí givið valskránni størri trúvirði, um Fólkaflokkurin kundi greitt frá, á hvørjum økjum sparingarnar skulu fremjast, so at hesi málini kunna røkkast.

Føroya Arbeiðsgevarafelag fegnast eisini um, at flokkurin leggur dent á týdningin av orkumálum, tó er umráðandi at dentur verður lagdur á at finna kostnaðareffektivar loysnir á avbjóðingunum á orkuøkinum.